Шетелдік дипломды қалай тануға болады

Білім туралы құжаттарды тану дегеніміз не

Шетелдік білім туралы құжатты тану — шетелдік білім беру ұйымы берген құжатты Қазақстан Республикасының аумағында пайдалану үшін ресми түрде растау рәсімі.

Тану барысында мыналар тексеріледі:

• білім туралы құжаттың түпнұсқалығы;

• құжат берілген кезде шетелдік ұйымның тиісті білім беру қызметін жүзеге асыру құқығының болуы;

• білім деңгейі мен біліктілік — сараптамалық бағалау талап етілетін жағдайларда;

• құжат беретін академиялық және кәсіби құқықтардың Қазақстан Республикасы заңнамасының талаптарына сәйкестігі.

Қандай құжаттар танылады

Тану рәсімі мынадай құжаттар үшін көзделген:

1. Негізгі орта және жалпы орта білім туралы құжаттар.

2. Техникалық және кәсіптік, орта білімнен кейінгі білім туралы құжаттар.

3. Жоғары және жоғары оқу орнынан кейінгі білім туралы құжаттар.

4. Шетелде алынған ғылыми дәреже беру туралы құжаттар.

Ғылыми дәреже беру туралы құжаттарды тану түпнұсқалығын тексеруді және белгіленген жағдайларда диссертация мен ғылыми жарияланымдарға сараптама жүргізуді көздейтін арнайы тәртіппен жүзеге асырылады.