ӘЛЕУМЕТТІК – ЭКОНОМИКАЛЫҚ СИПАТТАМАСЫ
Ордабасы ауданы Шымкенттiң солтүстiк батысына қарай орналасқан. Оңтүстiгi - Қазығұрт, шығысы - Сайрам, солтүстiгi - Бәйдібек, батысы - Түркiстан, Отырар, Арыс аудандарымен шектеседi. Жер көлемi 265 561 га, оның ішінде ауыл шаруашылығы мақсатындағы жер көлемі 208 мың 662 га, оның ішінде жайылымы 103 992 гектар.
Ордабасы (бұрынғы Бөген) ауданы 1964 жылы 3-наурызда құрылды. Аудан территориясы Қажымұқан, Шұбар, Бөржар, Бадам, Қараспан, Бөген, Жеңiс, Қарақұм, Төрткүл, Шұбарсу ауылдық округтерге бөлiнген.
АУДАН ТУРАЛЫ ҚЫСҚАША ТАРИХИ ДЕРЕКТЕРІ
Ордабасы ауданы /1993 жылға дейiн Бөген ауданы болып аталды/ Қазақстан Республикасы Жоғары Кеңестің 1964 жылғы ақпан айындағы Жарлығына сәйкес Түркiстан, Арыс, Алғабас және Сайрам аудандарының негiзiнде, солардың территориясынан еншi алып, өз алдына аудан болып құрылды.
Орталығы Темiрлан ауылы болды. Оған төмендегi ауылдық кеңестер қарады. Алғабас ауданынан - Бөген, Борлысай, Глинково, Жамбыл, Майбұлақ және Орлов; Түркiстан ауданынан - Бадам, Қараспан, Көлтоған, Темiрлан, Шұбар; Созақ ауданынан - Алғабас, Қосақжар, Мыңбұлақ, Қызылқұм ауданынан - Задария.
1964 жылғы сәуiрде Темiрлан мен Шұбар ауылдық кеңестерi бiрiгiп, Темiрлан ауылдық кеңесi (орталығы Темiрлан ауылы), Көлтоған мен Қараспан ауылдық кеңестерi бiрiгiп, Қараспан ауылдық кеңесi (орталығы Обручев ауылы) болды. Ал, сол жылдың мамырында Бөржар мен Ақдала ауылдық кеңестерi құрылды. Сол жылдың желтоқсанында Алғабас, Бөген, Борлысай, Глинково, Жамбыл, Қосақжар, Майбұлақ, Мыңбұлақ, Орлов ауылдық кеңестерi Алғабас ауданына қайтарылды.
1965 жылдың қаңтарында Сайрам ауданының Қатынкөпiр, Ленин ауданының Монтайтас ауылдық кеңестерi осы ауданға қарады. Ал 1967 жылдың қаңтарында Монтайтас ауылдық кеңесi Ленин ауданына қайта қосылды.
1967 жылдың қазанында Жаңаталап ауылында Жаңаталап ауылдық кеңесi ұйымдастырылды.
1968 жылы Түркiстан ауданынан Сыпатаев атындағы және «Октябрь» жемiс-жидек кеңшарлары қосылды.
1973 жылы Бөген құс фабрикасы, 1980 жылы «Мерей» құс фабрикасы құрылды.
1978 жылы Сыпатаев атындағы кеңшарынан «Көкарал» кеңшары еншi алып шықты.
1980 жылы «Ордабасы» мал бордақылау бiрлестiгi ұйымдастырылды, сөйтiп, аудан шаруашылығының саны ұлғайды. 1986 жылы «ХХI партсъезд» атындағы, «Шымкент» жемiс-жидек кеңшарлары мен «Шымкент» құс фабрикасы Сайрам ауданының құрамына берiлдi.
1988 жылғы 25-шiлдеде Бөген ауданы таратылып, Арыс қалалық Кеңесiнiң қарамағына кiрдi.
Қазақстан Республикасы Жоғарғы Кеңесiнiң 1989 жылғы 13-қазандағы №4178-VI Жарлығымен Бөген ауданы қайта құрылды. Ал, бұрынғы «Задария» қаракөл қой зауыты, «Дермене» дәрi-дәрмектiк, «Ақдала» қаракөл қой кеңшарлары Арыс ауданының құрамында қалып қойды.
