Онлайн қабылдау

Жылу энергиясын алу-сату энергия беруші немесе энергия өндіруші ұйымдардың жылу желілеріне қосылған тұтынушы мен энергиямен жабдықтаушы ұйым арасында жасалатын шарт негізінде жүзеге асырылады.

Жылу желілеріне қосылу және жылумен жабдықтауға шарт жасасу техникалық шарттар талаптары орындалғаннан кейін жүзеге асырылады.

Егер шартта өзгеше қарастырылмаса тұтынушыларға жылу энергиясын беруді энергиямен жабдықтаушы ұйым үздіксіз жүргізеді.

Шартқа жылу желілерінің теңгерімдік тиесілігін шектеу және тараптардың пайдалану жауапкершілігі актісі және осы Қағидалардың 20 тармағының 3) және 4) тармақшаларында көрсетілген құжаттар қоса беріледі.

Шартта тұтынушы туралы, жылу жүктемесі, жылу тұтынатын қондырғылардың жылуды тұтынуы, жылу желісіне қайтарылатын конденсаттың, есепке алу торабының деректері, тараптардың пайдалану жауапкершілігі, жылу энергиясына ақы төлеу шарттары көрсетіледі.

ҚР Энергетика министрінің 2014 жылғы 18 желтоқсандағы №211 бұйрығымен бекітілген Жылу энергиясын пайдалану қағидалары.

https://adilet.zan.kz/kaz/docs/V1400010234

Энергетикалық жабдықты пайдалану және оның техникалық жай-күйі, энергия өндіруші ұйымдар (жаңартылатын энергия көздерін пайдаланатын энергия өндіруші ұйымдарды қоспағанда), энергия беруші ұйымдар және жүйелік оператор бөлігінде электр энергетикасы саласындағы мемлекеттік бақылауды мемлекеттік энергетикалық қадағалау және бақылау жөніндегі мемлекеттік орган бақылау субъектілері (объектілері) қызметінің ҚР электр энергетикасы саласындағы заңнамасының талаптарына сәйкестігі тұрғысынан осы Заңға сәйкес – қашықтан бақылау және тексеру, ҚР Кәсіпкерлік кодексі мен осы Заңға сәйкес тергеп-тексеру нысанында жүзеге асырады.

 Бақылау органы мемлекеттік бақылауды ҚР Кәсіпкерлік кодексіне сәйкес жоспардан тыс тексеру, электр энергетикасы саласындағы бақылау субъектісіне (объектісіне) бару арқылы профилактикалық бақылау нысанында жүзеге асырады.

 Энергетикалық жабдығы бар жеке немесе заңды тұлғалар, энергия өндіруші ұйымдар (жаңартылатын энергия көздерін пайдаланатын энергия өндіруші ұйымдарды қоспағанда), энергия беруші ұйымдар және жүйелік оператор бақылау субъектілері (объектілері) болып табылады.

 Бақылау органы мемлекеттік бақылауды:

      1) ҚР электр энергетикасы саласындағы заңнамасы талаптарының сақталуына, сондай-ақ энергетикалық жабдықты пайдалану кезінде техникалық және технологиялық нормалардың сақталуына;

      2) энергетикалық жабдықты, электр станцияларын, электр желілерін, тұтынушылардың электр қондырғыларын қауіпсіз пайдалану жөніндегі талаптардың сақталуына;

      3) электр энергиясын өндірудің, берудің, жабдықтаудың және тұтынудың сенімділігі мен қауіпсіздігіне;

      4) техникалық пайдалану қағидалары мен қауіпсіздік техникасы қағидаларын білуін тексеруден өтпеген жұмыскерлерді электр қондырғыларында жұмыс істеуге жібермеу немесе жұмыстан шеттету бойынша;

      5) энергия өндіруші ұйымдардың (жаңартылатын энергия көздерін пайдаланатын энергия өндіруші ұйымдарды қоспағанда), энергия беруші ұйымдардың және жүйелік оператордың, оның ішінде күзгі-қысқы кезеңге даярлығына және жөндеу-қалпына келтіру жұмыстарын жүргізуіне жүзеге асырады.

Қазақстан Республикасының 2004 жылғы 9 шілдедегі N 588 "Электр энергетикасы туралы" Заңы

https://adilet.zan.kz/kaz/docs/Z040000588_

Тұрғын үйлерді жекешелендіру тәртібімен меншікке сатып алу үшін өтініш беруші "Азаматтарға арналған үкімет "мемлекеттік корпорациясы" КЕАҚ-ға (не "электрондық үкіметтің" веб-порталы арқылы) тұрғын үй комиссиясының қарауына мынадай құжаттарды ұсынады:
1) өздері тұратын тұрғынжайларды жекешелендіруге жалдаушының кәмелетке толған барлық отбасы мүшелерi қол қойған өтініш;
2) некеге тұру (бұзу), отбасы мүшелерінің қайтыс болуы, балалардың тууы туралы куәліктердің көшірмелері (қажет болуына қарай ақпараттық жүйеде мәліметтер жоқ болған жағдайда);
3) жалдау шарты не тұрғынжай ордері;
4) көрсетілетін қызметті алушының отбасы мүшелері деп басқа адамдар танылған жағдайда соңғысы өздерін көрсетілетін қызметті алушының отбасы мүшелері деп тану туралы сот шешімінің көшірмесі ұсынады;
5) ақпараттық жүйелерде мәліметтер болмаған жағдайда, "Тұрғын үй қатынастары туралы" Қазақстан Республикасының Заңының 13-бабының 8-тармағына жататын азаматтар мемлекеттік тұрғын үй қорынан өздері тұратын тұрғын үйлерді меншігіне тегін алу құқығын растайтын құжаттың көшірмесін қосымша ұсынады;
6) мемлекеттік қызметшілер, бюджеттік ұйымдардың жұмыскерлері, әскери қызметшілер, арнаулы мемлекеттік органдардың қызметкерлері, судьялар және мемлекеттік сайланбалы қызмет атқаратын адамдар санатына жататын азаматтар жұмыс орнынан (қызметтен) анықтаманы не жұмыскердің еңбек қызметін растайтын құжаттың көшірмесін қосымша ұсынады;
7) ғарышкерлікке кандидаттар, ғарышкерлер Қазақстан Республикасының Үкіметі беретін өздерінің мәртебесін растайтын құжаттың көшірмесін ұсынады;
8) тұрғынжайды жалдау шарты бойынша берешектің жоқ екендігін растайтын құжат;
9) Қағидалардың 11-тармағына сәйкес жекешелендірген жағдайда – мемлекеттік тұрғын үй қорынан тұрғынжайды меншігіне өтеусіз алуға құқығы бар азаматтардың санатына жататынын растайтын құжаттың көшірмесі.

"Тұрғын үй қатынастары туралы" Қазақстан Республикасының 1997 жылғы 16 сәуiрдегi N 94 Заңы, "Мемлекеттiк тұрғын үй қорынан берілетін тұрғын үйлерді жекешелендiру қағидаларын бекіту туралы"Қазақстан Республикасы Үкіметінің 2013 жылғы 2 шілдедегі № 673 қаулысы., "Мемлекеттік тұрғын үй қорынан берілетін тұрғын үйлерді жекешелендіру" мемлекеттік қызмет көрсету жөніндегі қағидаларды бекіту туралы Қазақстан Республикасы Индустрия және инфрақұрылымдық даму министрінің м.а. 2021 жылғы 12 тамыздағы № 437 бұйрығы

https://adilet.zan.kz/kaz/docs/V2100023983

ҚР «Тұрғын үй қатынастары туралы» Заңының 69 бабына сәйкес Қазақстан Республикасының кәмелетке толған азаматтары, қандастар мынадай жағдайларда тұрғын үйге мұқтаж деп танылады, егер:

• олардың тұрғын үйге мұқтаждар есебіне бірыңғай республикалық электрондық базаға және «Тұрғын үймен қамтамасыз ету орталығы» электрондық базасына қою кезінде соңғы бес жыл бойы Қазақстан Республикасының аумағында меншік құқығында тұрғын үйі болмаса;
• олардың тұрғын үйге мұқтаждар есебіне қою кезінде және мемлекеттік мекеменің тұрғын үй қорынан тұрғын үй берілген сәтте осы елді мекенде меншік құқығында тұрғын үйі болмаса;
• олардың тұрғын үйге мұқтаждар есебіне қою кезінде және мемлекеттік кәсіпорынның тұрғын үй қорынан тұрғын үй берілген сәтте Қазақстан Республикасының аумағында меншік құқығында тұрғын үйі болмаса;
• олардың жалғыз тұрғын үйі Қазақстан Республикасының заңнамасында көзделген тәртіппен апатты деп танылса, оны есепке алуды осы тұрғын үйдің орналасқан жері бойынша жергілікті атқарушы органдар жүзеге асырады.

Жетімдер мен ата-анасының қамқорлығынсыз қалған балалар 29 жасқа дейін кезекке тұра алады (кәмелетке толуды күтудің қажеті жоқ). Егер олар әскери қызметте болса, бұл жас қызмет ету мерзіміне ұзартылады.

Егер отбасы мүшесі мемлекеттен пәтер алған болса (коммуналдық қордан), азамат бірдей негіздер бойынша коммуналдық тұрғын үй қорынан тұрғын үйге мұқтаж деп таныла алмайды.

Егер азаматқа апаттық пәтердің орнына жаңа мемлекеттік пәтер берілсе, ол өзінің апаттық мүлкін мемлекеттің (әкімдіктің) меншігіне беруге міндетті.

Қазақстан Республикасы азаматтары мен қандастарды тұрғын үйге мұқтаждар есебіне «Тұрғын үймен қамтамасыз ету орталығы» электрондық базасына қоюды Отбасы банк («Отбасы банк» тұрғын үй құрылыс жинақ банкі» АҚ) жүзеге асырады. Мемлекеттік қызмет orken.otbasybank.kz сайтында онлайн түрде көрсетіледі.

Есепке алу қатаң түрде өтініш берушінің тиісті елді мекендегі тіркелген (тұрғылықты) жері бойынша жүргізіледі.