Коммуналдық қызметтерді қайта есептеу , тұтынушы нені білуі қажет?

Коммуналдық қызмет көрсетілмеген, толық көлемде ұсынылмаған немесе сапасы тиісті деңгейде болмаған жағдайда тұтынушы коммуналдық қызметтерді жеткізушіге төлемді қайта есептеу туралы талаппен жүгінуге құқылы.

Қайта есептеу негіздері

Қайта есептеу үшін мыналар негіз болуы мүмкін:

• коммуналдық қызмет көрсетудегі үзіліс;

• қызмет сапасының белгіленген талаптарға сәйкес келмеуі;

• қызметтің толық көлемде көрсетілмеуі;

• төлемдерді есептеудегі, есепке алу аспаптарының көрсеткіштеріндегі немесе есептік деректердегі қателер.

Қайта есептеу үшін қалай жүгінуге болады

1. Қызмет жеткізушіге бұзушылық туралы жеке өзі, электрондық нысанда немесе тұтынушылармен өзара іс-қимыл қызметі арқылы хабарлаңыз.

2. Бұзушылықтың басталған күні мен уақытын, оның сипатын, мекенжайыңызды және байланыс деректеріңізді көрсетіңіз.

3. Өтініш берген күнді, уақытты және өтінімнің тіркеу нөмірін тіркеп алыңыз.

4. Қажет болған жағдайда бұзушылықты растау үшін қызмет жеткізуші өкілінің келуін сұраңыз.

5. Мән-жайларды тексергеннен кейін қызмет жеткізуші қайта есептеу негіздерін айқындайды және белгіленген тәртіппен есептелген төлемдерге түзету енгізеді.

Қызмет сапасын қалпына келтіру мерзімі

Коммуналдық қызметтер көрсету қағидаларының үлгілік талаптарына сәйкес қызмет жеткізуші тұтынушы қызмет сапасының төмендегені туралы өтініш берген күннен бастап үш күнтізбелік күн ішінде қызмет сапасын қалпына келтіру үшін барлық шараларды қабылдауға және қайта есептеу жүргізуге міндетті.

Егер қызмет жеткізуші бұзушылықты растаудан бас тартса

Тұтынушы мынадай мәліметтерді көрсете отырып, акт және жазбаша өтініш жасауға құқылы:

• қызмет көрсетілмеуінің немесе оның сапасының нашарлауының басталған уақыты;

• бұзушылықтың сипаты;

• өтінім берілген уақыт және оның тіркеу нөмірі;

• тиісті сападағы қызмет көрсетудің қалпына келтірілген уақыты;

• бұзушылықтың жалпы ұзақтығы.

Көппәтерлі тұрғын үйде тұрған жағдайда акт пен өтінішке коммуналдық қызметтер көрсету қағидаларында көзделген тәртіппен тұтынушы және кемінде екі басқа тұлға қол қояды.

Жеке тұрғын үйде тұрған жағдайда акт пен өтінішке тұтынушы қол қояды.

Құжаттар коммуналдық қызметтерді жеткізушіге жолданады.

Есептеу тәртібі

Қайта есептеу мөлшері коммуналдық қызмет түрін, бұзушылықтың ұзақтығын, нақты көрсетілген қызмет көлемін, қолданылатын тарифті және тиісті есептеу қағидаларын ескере отырып айқындалады.

Барлық коммуналдық қызметтер үшін бірыңғай қайта есептеу формуласы қолданылмайды. Есептеу бұзушылықтың расталған мән-жайларын ескере отырып, тиісті қызмет түрі үшін белгіленген қағидаларға сәйкес жүргізіледі.

Қызмет жеткізушінің жауапкершілігі

Қызмет жеткізуші Қазақстан Республикасының заңнамасына және шарт талаптарына сәйкес коммуналдық қызметтердің сапасына қойылатын талаптардың сақталуы және төлемдердің дұрыс есептелуі үшін жауапты болады.

Тұтынушы заңнамада көзделген жағдайларда төлемді қайта есептеуді және нақты келтірілген залалды өтеуді талап етуге құқылы.

Келіспеушіліктер туындаған жағдайда тұтынушы тиісті уәкілетті органға оның құзыреті шегінде шағыммен жүгінуге немесе өз құқықтарын қорғау үшін сотқа жүгінуге құқылы.