ЖТҚ үшін жер учаскелерін алу

Жеке тұрғын үй құрылысы үшін жер учаскелері Қазақстан Республикасының азаматтарына аумақтардың дайындалуына немесе ЖТҚ үшін арналған бос жерлердің болуына қарай арнайы кезектілік тәртібімен беріледі.
1. Инженерлік инфрақұрылымның болуы
ЖТҚ үшін жер учаскелерін беруге сумен жабдықтау және электрмен жабдықтау желілерімен қамтамасыз етілген аумақтарда жол беріледі.
Орталықтандырылған сумен жабдықтау жүйесі жоқ елді мекендерде электрмен жабдықтау желілері болған жағдайда жер учаскелерін беруге рұқсат етіледі.
Жер учаскелерін бөлу бекітілген қала құрылысы құжаттамасын ескере отырып жүзеге асырылады.
2. Жер учаскесін беру
Дайындалған жер учаскесі болған жағдайда оны беру жер заңнамасында белгіленген тәртіппен тиісті жергілікті атқарушы орган (әкімдік) арқылы жүзеге асырылады.
Қалада немесе ауылдық елді мекенде жер учаскесін алу үшін жер қатынастары саласындағы тиісті мемлекеттік қызметтер қолданылады.
Жер учаскесін игеру кезеңінде ол уақытша өтеулі жер пайдалану (жалдау) құқығымен беріледі. Игеру шарттары мен мерзімдері заңнамаға және жер учаскесін беру туралы құжаттарға сәйкес белгіленеді.
3. Жер учаскесіне құжаттарды ресімдеу
Жер учаскесін беру туралы шешім қабылданғаннан кейін заңнамада көзделген құжаттарды, оның ішінде жер учаскесіне сәйкестендіру құжатын ресімдеу қажет.
Жер учаскесінің шекаралары жергілікті жерде белгіленгеннен кейін «Жер учаскесіне сәйкестендіру құжатын дайындау және беру» мемлекеттік қызметіне жүгінуге болады.
Жер пайдалану құқығы Қазақстан Республикасының заңнамасында белгіленген жағдайларда мемлекеттік тіркеуге жатады.
4. Жер учаскесін игеру және тұрғын үй салу
Алынған жер учаскесін нысаналы мақсатына сәйкес — жеке тұрғын үй құрылысы үшін пайдалану қажет.
Тұрғын үй құрылысы сәулет, қала құрылысы және құрылыс талаптарын сақтай отырып жүзеге асырылады.
Құрылыс аяқталғаннан кейін салынған жеке тұрғын үйді пайдалануға қабылдау актісін ресімдеу қажет.
Жер учаскесі нысаналы мақсаты бойынша пайдаланылмаған жағдайда Қазақстан Республикасының жер заңнамасында көзделген шаралар қолданылуы мүмкін.
5. Жер учаскесін жеке меншікке ресімдеу
Жер учаскесі игеріліп, жеке тұрғын үй пайдалануға берілгеннен кейін азамат жер учаскесінің орналасқан жері бойынша жергілікті атқарушы органға жеке меншік құқығын беру туралы өтінішпен жүгінеді.
Тұрғын үйге қызмет көрсетуге арналған жер учаскесіне жеке меншік құқығын беру туралы шешім салынған жеке тұрғын үйді пайдалануға қабылдау актісі негізінде қабылданады.
6. Меншік құқығын мемлекеттік тіркеу
Жер учаскесінің жеке меншікке берілгенін растайтын құжаттарды алғаннан кейін меншік құқығын заңнамада белгіленген тәртіппен тіркеу қажет.
Ол үшін «Жылжымайтын мүлікке құқықтарды (құқық ауыртпалықтарын) мемлекеттік тіркеу» мемлекеттік қызметі көзделген.
Мемлекеттік тіркеуден кейін меншік құқығы туралы мәліметтер құқықтық кадастрда көрсетіледі.