Сіз сәбиіңіздің дүниеге келуін күтудесіз

Қазақстан Республикасы Еңбек кодексінің 87-бабына сәйкес жүктілікке және баланың тууына байланысты демалыс әлеуметтік демалыстарға жатады. Жүктілік және босану бойынша демалыс беру тәртібі Қазақстан Республикасы Еңбек кодексінің 99-бабымен реттеледі.

Жүктілікке және босануға байланысты демалысты (декреттік демалысты) ресімдеу: жұмыс істейтін әйелдерге жалпы ұзақтығы 126 күнтізбелік күн (бала туылғанға дейін 70 күнтізбелік күн және бала туылғаннан кейін 56 күнтізбелік күн) жүктілікке және босануға байланысты демалыс беріледі. Асқынған босану немесе екі және одан да көп бала туған жағдайда демалыс 140 күнтізбелік күнге дейін ұзартылады.

Демалысты рәсімдеу үшін еңбекке уақытша жарамсыздық парағын (аурухана парағы) алу қажет. Оны акушер-гинеколог дәрігер (бөлімше меңгерушісімен бірлесіп немесе ДКК қорытындысы бойынша) жүктіліктің 30 аптасына жеткенде (ал жүктіліктің қиындауы немесе экологиялық апат аймақтарында тұру кезінде — ертерек мерзімде) береді.

Ресімдеу тәртібі:

Ресімдеу тәртібі: еңбекке уақытша жарамсыздық парағын медициналық ұйым белгіленген ережелерге сәйкес береді. Жүктілікке және босануға байланысты демалыс беру үшін қызметкер жұмыс берушіге уақытша еңбекке жарамсыздық туралы өтініш пен Парақ береді. Жұмыс беруші тиісті актімен демалыс беруді ресімдейді. Жүктілікке және босануға байланысты табысынан айырылу жағдайы бойынша әлеуметтік төлемді тағайындау үшін мемлекеттік қызмет көрсетудің қолжетімді арналары арқылы белгіленген тәртіппен жүгіну қажет.

3 жасқа толғанға дейін бала күтімі бойынша жалақысы сақталмайтын демалыс: жұмыс беруші анасы, әкесі, асырап алушысы не қамқоршысының өтініші бойынша (баланың туу туралы куәлігі негізінде) 3 жасқа толғанға дейін бала күтімі бойынша жалақысы сақталмайтын демалыс беруге міндетті. Демалысты толығымен немесе бөліктерге бөлуге болады. Демалыс кезеңінде қызметкердің жұмыс орны (лауазымы) сақталады. Жұмысқа мерзімінен бұрын шығу ниеті туралы жұмыс берушіге бір ай бұрын ескерту қажет.

Босануға дайындық мектептері арқылы босануға қалай дайындалу керек: босанудың қауіпсіз өтуі үшін болашақ аналарға емханалар жанындағы арнайы дайындық мектептеріне бару ұсынылады. Сабақтарды білікті акушерлер, дәрігерлер мен психологтар жүргізеді. Бағдарлама тыныс алу әдістерін игеруге, босану нұсқаларымен (табиғи босану, кесар тілігі) танысуға және баланың пайда болуына психологиялық тұрғыдан бейімделуге көмектеседі.