Ақтөбе облысында санитариялық-эпидемиологиялық қызметке маман даярлауға арнаулы грант бөлінді

Ақтөбе облысында санитариялық-эпидемиологиялық қызметтің кадрлық әлеуетін күшейтуге бағытталған жаңа бастама қолға алынды. 2026–2027 оқу жылынан бастап Марат Оспанов атындағы Батыс Қазақстан медицина университетінде «Медико-профилактикалық іс» мамандығы бойынша білім алуға облыс әкімінің 5 арнаулы гранты бөлінді.

Бастаманың мақсаты – өңірдегі санитариялық-эпидемиологиялық қызметтің білікті мамандарға деген қажеттілігін қамтамасыз етіп, қоғамдық денсаулық сақтау саласына кәсіби кадрлардың жаңа буынын қалыптастыру.

Арнаулы гранттар Ақтөбе облыстық санитариялық-эпидемиологиялық бақылау департаментінің бастамасымен бөлініп отыр. Бұл – өңірдегі санитариялық-эпидемиологиялық саланың кадрлық әлеуетін арттыруға бағытталған маңызды қадам.

Грант иегерлеріне оқуын аяқтағаннан кейін Ақтөбе облысында еңбек етуге басымдық беріледі. Мемлекеттік қолдау арқылы даярланған мамандардың өңірдің санитариялық-эпидемиологиялық қызметіне келіп, кадр тапшылығын азайтуға үлес қосуы көзделген. Грант негізінде білім алған түлектердің Ақтөбе облысында кемінде 5 жыл еңбек етуі қарастырылған.

Сонымен қатар, өңірде санитариялық-эпидемиологиялық бағыт бойынша арнаулы орта білім алуға да мүмкіндік жасалды. Биыл Бопай ханым атындағы жоғары медициналық колледжінде алғаш рет «Медико-профилактикалық іс» мамандығы бойынша кафедра ашылып, жаңа оқу жылында 27 талапкер осы бейіндік мамандықты таңдап, ақылы негізде білім алуға қабылданды.

Санитариялық-эпидемиологиялық қызмет – инфекциялық аурулардың алдын алу, халықтың санитариялық саламаттылығын қамтамасыз ету және қоғамдық денсаулықты қорғау жүйесіндегі маңызды буын. Сондықтан осы салаға кәсіби мамандар даярлау – өңірдің денсаулық сақтау жүйесіне салынған ұзақ мерзімді инвестиция.

Жаңа бастаманың жыл сайын жалғасын табуы өңірдегі кадрлық қажеттілікті жүйелі түрде қамтамасыз етуге мүмкіндік береді деп күтілуде.

Жарияланған күні

02 қыркүйек 2026

Жаңарту күні

02 қыркүйек 2026