Қазақстан ФАО/ГЭФ-тің пестицидтердің денсаулыққа әсер ету тәуекелдерін төмендету жөніндегі халықаралық іс-шарасына қатысты

Қазақстан ФАО/ГЭФ-тің пестицидтердің денсаулыққа әсер ету тәуекелдерін төмендету жөніндегі халықаралық іс-шарасына қатысты

2025 жылғы 18 желтоқсанда Стамбул қаласында (Түркия) қазақстандық делегация ФАО/ГЭФ ұйымдастырған, пестицидтердің халық денсаулығына әсері және ұлттық ден қою жүйелерін нығайту мәселелеріне арналған халықаралық гибридті іс-шараға қатысты.

Іс-шараға Орталық Азия елдерінің салалық министрліктерінің өкілдері, халықаралық сарапшылар, сондай-ақ БҰҰ жүйесіне кіретін ұйымдар қатысты. Қатысушылар пестицидтерді қолданумен байланысты денсаулыққа төнетін тәуекелдерді төмендетудің практикалық шараларын және ведомствоаралық өзара іс-қимылды күшейту жолдарын талқылады.

Іс-шара аясында уланудың алдын алу және емдеу мәселелері, ұлттық токсикологиялық орталықтарды дамыту, сондай-ақ пестицидтердің денсаулыққа әсері туралы деректерді мемлекеттік саясатқа және санитариялық-эпидемиологиялық бақылау жүйелеріне интеграциялау мәселелері қарастырылды.

Қазақстандық делегация құрамына Санитариялық-эпидемиологиялық бақылау комитеті төрағасының орынбасары Нұрқан Садвакасов кірді. Ол өз сөзінде санитариялық-эпидемиологиялық бақылау саласындағы ұлттық тәжірибені таныстырып, пестицидтермен уланудың алдын алу және оған ден қою жүйесін күшейтуге бағытталған елдік жол картасын әзірлеуге қатысты.

Іс-шара нақты елдерге бағытталған практикалық семинармен аяқталды, оның барысында халық денсаулығын қорғау шараларын пестицидтерді басқарудың ұлттық жүйелеріне интеграциялау жөніндегі жол карталары әзірленді.

 

Жарияланған күні

19 желтоқсан 2025

Жаңарту күні

19 желтоқсан 2025