Мұнай-газ саласындағы әлеуметтік әріптестік пен әлеуметтік және еңбек қатынастарын реттеу жөніндегі салалық комиссияның 1-ші отырысының Баспасөз-хабарламасы
Көру саны:46
2019 жылғы 28 ақпанда ҚР Энергетика вице-министрі Б.О. Ақшолақовтың төрағалығымен мұнай-газ саласындағы әлеуметтік әріптестік пен әлеуметтік және еңбек қатынастарын реттеу жөніндегі салалық комиссияның 1-ші отырысы өтті.
Аталған отырысқа ҚР Энергетика министрлігінің, «Атамекен» ҰКП, «KAZENERGY» қауымдастығының жұмыс берушілері мен қызметкерлердің салалық бірлестіктерінің, салалық кәсіподақтардың, сондай-ақ мұнай-газ кәсіпорындарының өкілдері қатысты.
Отырыс барысында Салалық комиссия төрағасының орынбасары, ҚР Энергетика министрлігі Мұнай өнеркәсібін дамыту департаменті директорының орынбасары Б.А. Маханов Салалық комиссияның 2018 жылғы 7 желтоқсандағы хаттамасының орындалуы және Салалық комиссия құрамының өзгеруі туралы баяндады. Сондай-ақ ҚР ҰКП Президиумының Әлеуметтік сала және әлеуметтік серіктестік комитетінің төрағасы Т.К. Доскенов, «KAZENERGY» қауымдастығының атқарушы директоры Л.Ж. Ахмурзина, сондай-ақ Салалық кәсіподақтардың басшылары сөз сөйледі.
Салалық комиссия отырысының қорытындысы бойынша бірауыздан мынадай ШЕШІМДЕР қабылданды:
1) «2019 жылға арналған мұнай-газ саласындағы әлеуметтік әріптестік пен әлеуметтік және еңбек қатынастарын реттеу жөніндегі Салалық комиссия жұмысының негізгі бағыттары» бекітілді.
2) Мұнай-газ саласындағы әлеуметтік әріптестік пен әлеуметтік және еңбек қатынастарын реттеу жөніндегі Салалық комиссия туралы ережеге өзгерістер мен толықтырулар енгізілді.
3) Қазақстан Республикасының мұнай-газ, мұнай өңдеу және мұнай-химия салаларында 2020-2022 жылдарға арналған Салалық келісімді әзірлеу жөніндегі жұмыс тобының құрамы бекітілді.
Салалық келісім – әлеуметтік-еңбек қатынастарын және олармен байланысты 2020 – 2022 жылдардағы экономикалық қатынастарды және оны іске асырудың бірлескен іс-қимылдарын реттеудің негізгі бағыттары бойынша әлеуметтік әріптестік тараптарының келісілген ұстанымдарын айқындайтын негізгі құжат.
4) 2019 жылға арналған «Мұнай-газ саласындағы әлеуметтік әріптестік» тақырыбында көшпелі семинар-кеңестер өткізу графигі бекітілді.
2017 және 2018 жылдары Министрлік «KAZENERGY» қауымдастығы және мұнай-газ саласының салалық кәсіподақтарымен бірлесіп, мұнай өндіруші өңірлерде Салалық келісімнің негізгі ережелерін түсіндіру бойынша облыстық әкімдіктер өкілдерінің, жұмыс берушілердің және мұнай-газ саласы қызметкерлері өкілдерінің қатысуымен бірқатар семинар-кеңестер өткізді. Аталған шешімдерді қабылдау әлеуметтік-еңбек қарым-қатынастарына оң әсерін тигізетінін және республиканың мұнай-газ саласындағы еңбек ұжымдарындағы жағдайды жақсартады.
Айта кету керек, мұнай-газ саласының әлеуметтік және еңбек қатынастарын реттеу бойынша әлеуметтік серіктестер жүргізетін жұмыстар капиталдың, жалдамалы еңбек пен мемлекеттің қарама-қарсы көзқарастарын үйлестіре білу, ымыраға келу және қайшылықтарды бейтараптандыру.
Отырыс соңында Салалық комиссия төрағасы, ҚР Энергетика вице-министрі Б.О. Ақшолақов әлеуметтік серіктестік тараптарына ұйымшылдығы мен нәтижелі жұмысы үшін алғысын білдірді.
ҚР Энергетика министрлігінің Баспасөз қызметі