Лицензиялау және қолжетімділікті қамтамасыз ету
Лицензиялау және қолжетімділікті қамтамасыз ету
2025 жылғы 1 қаңтардан бастап Қазақстанда халықты әлеуметтік қорғау саласында арнаулы әлеуметтік қызметтер көрсететін ұйымдарды міндетті лицензиялау енгізілді.
Лицензиялаудың негізгі мақсаты — әлеуметтік қызметтердің сапасы мен қауіпсіздігін арттыру, алушылардың құқықтарын қорғау және меншік нысанына қарамастан ұйымдарға қойылатын бірыңғай талаптарды белгілеу.
Лицензиялауға әртүрлі жағдайларда арнаулы әлеуметтік қызметтер көрсететін ұйымдар жатады, оның ішінде:
- стационар жағдайында;
- жартылай стационар жағдайында;
- уақытша болу жағдайында;
- үйде.
Лицензия алу үшін ұйым белгіленген біліктілік талаптарына сәйкес келуі тиіс.
Атап айтқанда, мыналар бағаланады:
- тиісті материалдық-техникалық базаның болуы;
- үй-жайлардың жай-күйі және белгіленген талаптарға сәйкестігі;
- санитариялық-эпидемиологиялық және өрт қауіпсіздігі нормаларының сақталуы;
- білікті мамандардың болуы;
- мүгедектігі бар адамдар мен халықтың жүріп-тұруы шектеулі топтары үшін қолжетімділікті қамтамасыз ету талаптарының сақталуы.
Лицензиялау Қазақстан Республикасының Әлеуметтік кодексіне және Қазақстан Республикасы Еңбек және халықты әлеуметтік қорғау министрінің 2024 жылғы 28 маусымдағы № 230 бұйрығымен бекітілген «Арнаулы әлеуметтік қызметтер көрсетуге лицензия беру» мемлекеттік қызметін көрсету қағидаларына сәйкес жүзеге асырылады.
Қолжетімділікті қамтамасыз ету
Маңызды талаптардың бірі — арнаулы әлеуметтік қызметтер алушылар үшін қолжетімді және қауіпсіз орта құру.
Ұйымдар мүгедектігі бар адамдар мен халықтың басқа да жүріп-тұруы шектеулі топтарының объектілер мен үй-жайларға кедергісіз қол жеткізу мүмкіндігін қамтамасыз етуге тиіс.
Бұл адамның қажеттіліктерін ескере отырып, қажетті жағдайлар жасауды, оның ішінде үй-жайлардың, тиісті инфрақұрылымның қолжетімділігін және қауіпсіз болу жағдайларын қамтамасыз етуді қамтиды.
Осылайша, қолжетімділік — бұл қызметтің болуы ғана емес, адамның оны іс жүзінде және қауіпсіз түрде алу мүмкіндігі.