Арнаулы әлеуметтік қызметтер көрсететін ұйымдарды лицензиялау
Арнаулы әлеуметтік қызметтердің сапасы мен қолжетімділігін арттыру мемлекеттік әлеуметтік саясаттың басым бағыттарының бірі болып табылады.
Көрсетілетін қызметтердің сапасы мен қауіпсіздігіне қойылатын бірыңғай талаптарды қамтамасыз ету мақсатында 2025 жылғы 1 қаңтардан бастап арнаулы әлеуметтік қызметтер көрсететін ұйымдардың қызметін міндетті лицензиялау енгізілді.
Меншік нысанына қарамастан, арнаулы әлеуметтік қызметтер көрсететін барлық ұйымдар лицензиялауға жатады.
Лицензия алу үшін ұйымдар белгіленген біліктілік талаптарына сәйкес келуі тиіс. Атап айтқанда, арнаулы әлеуметтік қызметтер көрсетуге жарамды, санитариялық нормалар мен өрт қауіпсіздігі талаптарына сәйкес келетін ғимараттар мен үй-жайлардың, қажетті материалдық-техникалық базаның және штаттағы қызметкерлердің болуы талап етіледі. Сонымен қатар ғимараттың жүріп-тұруы шектеулі адамдар мен халықтың басқа да мобильдігі төмен топтары үшін кедергісіз әрі қауіпсіз болуына жағдай жасалуы қажет.
Лицензия алуға өтінім электрондық түрде Әлеуметтік қызметтер порталы арқылы беріледі: aleumet.egov.kz.
Міндетті лицензиялауды енгізу арнаулы әлеуметтік қызметтердің сапасы мен қолжетімділігін арттыруға, қызмет алушылардың қауіпсіздігін қамтамасыз етуге және белгіленген талаптардың сақталуына мемлекеттік бақылауды күшейтуге бағытталған.
Лицензиялау мүмкіндігі шектеулі адамдарды және қызмет алушылардың басқа да санаттарын әлеуметтік оңалтудың тиімділігін арттыруға, көрсетілетін қызметтердің сапасын жетілдіруге, сондай-ақ осы саладағы бұзушылықтар санын азайтуға ықпал етеді.
