Симуляциялық жаттығу – Қарағанды облысында ірі қара малдың нодулярлы дерматиті бойынша өткізілді

Қазақстан Республикасы Үкіметі мен Дүниежүзілік жануарлар денсаулығын сақтау ұйымы арасындағы Келісім шеңберінде ҚР Ауыл шаруашылығы министрлігінің Ветеринариялық бақылау және қадағалау комитеті 2025 жылға арналған ветеринариялық қызметтер арасында симуляциялық жаттығулар жоспарын бекітті.

Аталған жоспарға сәйкес, Қарағанды облысының Шет ауданында ірі қара малдың нодулярлы дерматиті ауруының таралуына әрекет ету бойынша симуляциялық жаттығу ұйымдастырылды.

Іс-шараға ҚР АШМ ВБҚК Қарағанды облыстық аумақтық бөлімшесінің мамандары, ветеринария басқармасы, мемлекеттік ветеринариялық ұйымдардың өкілдері, ветеринариялық зертхана қызметкерлері, республикалық эпизоотиялық жасақ және жергілікті атқарушы органдардың өкілдері қатысты.

Жаттығудың мақсаты — өңірдің ветеринариялық қызметінің нодулярлы дерматит ауруының ықтимал жағдайларына жедел ден қоюға дайындығын тексеру, ведомствоаралық өзара іс-қимыл тетіктерін жетілдіру, эпизоотиялық ахуалды бақылауды күшейту және ДЖДСҰ ұсынымдарына сәйкес мамандардың іс-әрекеттерінің тиімділігін арттыру.

Жаттығу ветеринариялық-санитариялық нормаларға қатаң сәйкестікте өткізіліп, қауіпті аурудың таралу қаупі туындаған жағдайда үйлестірілген іс-әрекеттерді пысықтауға арналған маңызды тәжірибелік алаңға айналды.