Телекоммуникациялар комитеті Қазақстандық байланыс операторлары қауымдастығымен кездесу өткізді.

Жиында 2024 жылдың қорытындылары айтылып, 2025 жылға арналған жоспар талқыланды. Қауымдастық мүшелері өз қызметтері туралы есеп беріп, саланың жетістіктері мен шешілуі қажет мәселелерді атады. Ерекше назар нормативтік реттеу, инвестициялық климатты жақсарту және әкімшілік кедергілерді азайтуға аударылды.

Кездесуде инфрақұрылымға қолжетімділік, интернет қызметтерін лицензиялау, байланыс операторларының міндеттемелерін нақтылау және цифрлық технологияларды дамыту мәселелері қозғалды. Операторлар кабельдік желілер мен мемлекеттік меншік объектілерін жалға алу тарифтерін реттеп, нарықтағы барлық қатысушыларға тең жағдай жасауды ұсынды. Сондай-ақ, интернет қызметін лицензиялау жүйесін қайтару мәселесі қаралды, себебі бұл нарықты жүйелеуге және сапаны бақылауға көмектеседі. Байланыс операторларының техникалық және құқықтық міндеттемелерін нақты белгілеу қажеттілігі де көтерілді, бұл саладағы түсініспеушіліктерді азайтуға мүмкіндік береді. Сонымен қатар, Wi-Fi 6E және Wi-Fi 7 енгізу арқылы телекоммуникация саласында заманауи шешімдерді дамыту ұсынылды.

Комитет өкілдері операторлардың ұсыныстарын тыңдап, реттеушілік мәселелер бойынша қолдау көрсетуге дайын екенін білдірді. Тараптар саланы дамыту мақсатында тұрақты жұмыс кездесулерін өткізуге келісті.