Астанада «Ұлттық геологиялық қызметі» АҚ пен француздық BRGM агенттігінің екі жылдық жобасының алғашқы семинары басталды

Астанада 1–3 желтоқсан аралығында «Ұлттық геологиялық қызметі» АҚ пен Францияның BRGM агенттігінің екі жылдық бірлескен жобасының алғашқы семинары өтіп жатыр. Жоба 2025–2027 жылдарға арналған және Қазақстан мамандарының геология, минералогия, геофизика, Жерді қашықтықтан зондтау, перспективалы кен орындарын карталау және тау-кен қалдықтарын басқару саласындағы кәсіби біліктілігін арттыруға бағытталған. Сонымен қатар, жобаның маңызды міндеттерінің бірі – Қазақстан мен Франция арасындағы ғылыми-техникалық ынтымақтастықты нығайту.

Кіріспе семинардың ресми ашылуы Назарбаев Университетінің Тауды өңдеу және Жер ғылымдары мектебінде өтті. Ашылу рәсіміне Францияның Қазақстандағы Елшісі Сильван Гийю, «Ұлттық геологиялық қызметі» АҚ Басқарма төрағасы Ерлан Галиев, BRGM-ның Азиядағы жобалар жетекшісі Оливье Фрезо және Назарбаев Университетінің Тауды өңдеу және Жер ғылымдары мектебінің вице-деканы Пейман Пурафшари қатысып, қатысушыларға сәлемдесу сөзін арнады. Спикерлер жобаның саланы дамыту, елдер арасындағы тәжірибе алмасу және жаңа жоғары білікті кадрларды даярлау үшін маңыздылығын атап өтті.

Жоба аясында геодеректер, қашықтықтан зондтау, геофизика, геохимия, перспективалы учаскелерді карталау, тау-кен қалдықтарын қайта өңдеу және алаң жұмыстары бойынша тақырыптық семинарлар өткізіледі. Сонымен қатар, бір практикалық воркшоп және жас мамандар үшін Францияда үш ғылыми тағылымдама қарастырылған.

Қатысушылар ҰГҚ пен BRGM-ның презентацияларымен танысып, оқыту сабақтарына қатысып, Франциядағы тағылымдамаларға үміткер болу мүмкіндігіне ие болады. Бағдарлама аясында олардың іріктеуі қазірден басталған.