Еңбекке адал, мақсатқа берік Роза Искалиева
Халықаралық әйелдер күні қарсаңында маңдай терімен ел дамуына елеулі үлес қосып жүрген нәзік жандылар туралы әңгімелейміз. Солардың бірі — жоғары жауапкершілігімен, кәсібилігімен және таңдаған ісіне адалдығымен ерекшеленген Искалиева Роза Шарапайқызы.
Роза Шарапайқызы 1965 жылғы 13 шілдеде Қостанай облысының Қарасу ауылында дүниеге келген. Жастайынан адал еңбек етіп, сеніп тапсырылған іске жауап беру – өмірлік басты қағида екенін бойына сіңіріп өсті. Дәл осы ұстанымдар оның көпжылдық кәсіби жолының берік негізіне айналды.
Еңбек жолын 1981 жылы Дон зауытында бақылаушы маман ретінде бастады. Сол кезеңнің өзінде-ақ оның ұқыптылығы, тәртіптілігі және жұмыс сапасына деген жоғары талапшылдығы айқын көрінді.
1986 жылы Роза Шарапайқызы Новороссийск мемлекеттік тұқым инспекциясы мекемесіне бас инженердің орынбасары лауазымына қабылданды. Жауапты учаскеде еңбек етіп, өндірістік процестерді ұйымдастырумен және тұқымдық материалдың жоғары сапасын қамтамасыз етумен айналысты.
2000 жылдан бастап бүгінгі күнге дейін Роза Шарапайқызы «Одақ ЛТД» серіктестігінде өндірістік лаборант болып еңбек етуде. Ол өзін астық өндіру мен сақтау саласының ерекшеліктерін терең меңгерген, жоғары білікті маман ретінде танытты.
Негізгі міндетіне элеватордың санитариялық жағдайын бақылау, ауыл шаруашылығы тауар өндірушілерінен келіп түсетін астықтың сапасына талдау жүргізу, өнімді дұрыс сақтау мен экспортқа дайындауды қамтамасыз ету кіреді. Оның кәсібилігіне астықтың белгіленген стандарттар мен халықаралық нарық талаптарына сәйкестігі тікелей байланысты.
Тек 2024 жылдың өзінде элеваторға 33 мың тонна астық қабылданып, кейін экспортқа жөнелтілді. Бұл көрсеткіштердің артында күнделікті тынымсыз еңбек, сапаға қатаң бақылау және түпкілікті нәтижеге деген жоғары жауапкершілік жатыр.
Роза Шарапайқызы ұжымда зор құрметке ие. Әріптестері оның ұстанымға берік, еңбекке адалдығын жоғары бағалайды.
Көпжылдық адал қызметі, кәсібилігі және аграрлық саланың дамуына қосқан елеулі үлесі үшін Роза Шарапайқызына 2025 жылы Қазақстан Республикасы Президенті «Ерен еңбегі үшін» мемлекеттік марапат тапсырды.
Роза Искалиеваның қызмет жолы – еңбек, жауапкершілік және өз ісіне деген сүйіспеншілік тек бір кәсіпорынның ғана емес, тұтас бір саланың табысты дамуына берік негіз қалайтынының айқын үлгісі.
Еңбекқор жандар – ел мақтанышы әрі азық-түлік қауіпсіздігінің сенімді тірегі.