Кедендік ынтымақтастықты нығайту
Қазақстан мен Гонконг кедендік әкімшілендіру саласындағы белсенді ынтымақтастыққа алғашқы қадамдарын жасауда.
Соңғы жылдары екі тарап арасындағы өзара сауданың айтарлықтай өсуі байқалды. Осылайша, 2024 жылдың қорытындысы бойынша тауар айналымының көлемі 129,5 млн АҚШ долларына жетті, бұл өткен жылмен салыстырғанда 71,7%-ға артық. Оң серпін 2025 жылы да сақталуда — қаңтар–тамыз айларында тауар айналымы тағы 59,6%-ға өсіп, 130,7 млн АҚШ долларын құрады.
Қазақстан өзінің географиялық жағдайына байланысты Еуропа мен Азия арасындағы транзиттік көпір ретінде стратегиялық рөл атқарып, халықаралық көлік бағдарлары мен сауда ағындарының дамуына ықпал етеді. Гонконг, керісінше, кедендік және сауда рәсімдерінің тиімділігінің жоғары деңгейімен ерекшеленетін қаржы және логистиканың жетекші әлемдік орталықтарының бірі болып табылады.
2025 жылғы 29 қазанда Астана қаласында Қазақстан Республикасы Қаржы министрлігінің Мемлекеттік кірістер комитеті өкілдерінің Гонконг Арнайы әкімшілік ауданының (ҚХР) Кеден қызметінің делегациясымен алғашқы кездесуі өтті.
Кездесу барысында тараптар кедендік әкімшілендіру саласындағы өзекті өзгерістер мен инновацияларға арналған өз презентацияларын ұсынды, тәжірибе мен озық практикаларымен бөлісті, сондай-ақ ынтымақтастық және өзара әкімшілік көмек туралы келісімге қол қоюды, цифрлық ақпарат алмасуды дамытуды және халықаралық кедендік жобаларға қатысуды қоса алғанда, одан әрі ынтымақтастықтың ықтимал бағыттарын талқылады.
Келіссөздер өзара түсіністік пен сындарлы диалог жағдайында өтті. Кездесу қорытындысы бойынша уәкілетті экономикалық операторлар (УЭО) бағдарламасын өзара тану жөніндегі бірлескен іс-қимыл жоспарына қол қойылды. Құжат тәжірибе алмасуды, бірлескен консультациялар өткізуді, сондай-ақ сыртқы экономикалық қызметтің сенімді қатысушыларына кедендік жеңілдіктерді өзара негізде пайдалануға мүмкіндік беретін УЭО мәртебесін өзара тану тетіктерін әзірлеуді көздейді.
Келісімді іске асыру халықаралық сауда рәсімдерін жеңілдету, кедендік бақылаудың тиімділігін арттыру және екі тараптың кеден қызметтері арасындағы сенімді нығайту бағытындағы маңызды қадам болмақ.
Кездесу соңында қазақстандық тарап Лоуренс мырзаға және Гонконгтың Кеден қызметі делегациясына сындарлы диалог пен одан әрі өзара іс-қимылға дайындық танытқандары үшін ризашылық білдіріп, қол жеткізілген уағдаластықтар ұзақ мерзімді әріптестікті дамытуға берік негіз қалайтынын атап өтті.