ДЕНСАУЛЫҚ САҚТАУ ВИЦЕ-МИНИСТРІ БАТЫС ҚАЗАҚСТАН ОБЛЫСЫНЫҢ ТҰРҒЫНДАРЫМЕН КЕЗДЕСУ ӨТКІЗДІ

Денсаулық сақтау вице-министрі Ардақ Амангелдиев жұмыс сапарымен Батыс Қазақстан облысына барып, тұрғындармен, медициналық қоғамдастықпен бірқатар кездесулер өткізіп, өңірлік денсаулық сақтау ұйымдарының қызметімен танысты.

Тасқала ауданының тұрғындарымен кездесу

Сапар барысында Ардақ Амангелдиев Тасқала ауданына барып, аудандық мәдениет үйінде өңірдің тұрғындарымен және медицина қызметкерлерімен кездесу өткізді.

Ауылдағы медициналық көмектің қолжетімділігін арттыру, дәрігерлік кадрлар тапшылығын қысқарту және медициналық инфрақұрылымды жаңғырту мәселелеріне басты назар аударылды.

Вице-министр елімізде медициналық-санитариялық алғашқы көмекті нығайту, фельдшерлік-акушерлік пункттерді жаңарту, жедел медициналық көмек жұмысын жақсарту және процестерді цифрландыру бойынша жүзеге асырылып жатқан шаралар туралы айтып берді.

Аудан тұрғындары кадрлармен қамтамасыз ету, медициналық қызметтер мен дәрі-дәрмекпен қамтамасыз ету сапасына қатысты өзекті сұрақтар қойып, жүйені жетілдіру бойынша өз ұсыныстарын білдірді.

Талқылау қорытындысы бойынша Ардақ Амангелдиев азаматтардың өтініштеріне толық жауап берді және жеке қабылдау өткізді, оның барысында тұрғындардың жеке сұрақтарын қарады.

Жақ-бет хирургиясының жаңа бөлімшесінің ашылуы

Сапардың екінші күні Вице-министр облыстық көпбейінді балалар ауруханасында болып, облыстық денсаулық сақтау басқармасының басшысы Мадияр Өтешевпен бірге мекеменің жұмысымен және оның материалдық-техникалық базасымен танысты.

Аурухананың базасында балаларға шұғыл және жоспарлы медициналық көмек көрсетуге арналған 10 төсектік жақ-бет хирургиясы бөлімшесінің салтанатты ашылуы өтті:

➤ жақ-бет аймағының туа біткен және жүре пайда болған кемістіктері;

➤ ерін мен таңдайдың жырықтары;

➤ жақ-бет аймағының жарақаттары мен сынықтары;

➤ ісік және қабыну аурулары.

Сонымен қатар, Вице-министр аурухананың тарихымен танысып, мекеменің ішкі мұражайына барды.

Кәсіби қоғамдастықпен жұмыс

Жұмыс сапары барысында Ардақ Амангелдиев облыстың медициналық қоғамдастығының өкілдерімен кездесу өткізіп, міндетті әлеуметтік медициналық сақтандыру және медициналық қызмет көрсету мәселелері бойынша заңнамадағы өзгерістерді талқылады.

Сапар қорытындысы бойынша вице-министр ауылдық медицинаны дамыту денсаулық сақтау саласындағы мемлекеттік саясаттың басым бағыттарының бірі болып қала беретінін атап өтті. Ол инфрақұрылымды жаңғыртудың, заманауи технологияларды енгізудің және медицина қызметкерлерінің, әсіресе ауылдық жерлерде біліктілігін арттырудың маңыздылығын атап өтті.

«Тұрғылықты жеріне қарамастан, әрбір азамат үшін сапалы медициналық көмектің қолжетімділігі Денсаулық сақтау министрлігінің басты басымдығы болып табылады. Ауыл медицинасы ерекше назар аударуды қажет етеді және біз оны нығайту бойынша жұмысты жалғастырамыз»,

– деп атап өтті Ардақ Амангелдиев.

Жұмыс сапары Батыс Қазақстан облысының денсаулық сақтау жүйесінің жай-күйімен егжей-тегжейлі танысуға және оны одан әрі дамытудың басым бағыттарын айқындауға мүмкіндік берді.